Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Danjiraha cusub ee Boqortooyada Midowday (UK) u fadhiya Soomaaliya, Mr. Charles Nicholas King. Kulankan ayaa diiradda lagu saaray xoojinta iskaashiga laba geesoodka ah ee u dhaxeeya Soomaaliya iyo UK.
Labada mas’uul ayaa ka wada hadlay arrimo muhiim ah oo ay ka mid yihiin:
• Horumarinta amniga iyo dagaalka ka dhanka ah Khawaarijta
• Taageerada UK ee geeddi-socodka siyaasadeed ee Soomaaliya
• Hufnaanta doorashooyinka qof iyo cod
• Kor u qaadidda mashaariicda horumarineed ee ay UK ka fuliso gudaha dalka
Ra’iisul Wasaaraha ayaa uga mahadceliyay dowladda UK doorkeeda firfircoon ee taageerada ay siiso Soomaaliya, gaar ahaan dhanka amniga, garab istaagga ciidamada qalabka sida, iyo barnaamijyada dib-u-dhiska iyo horumarinta.
Sidoo kale, Mudane Xamsa Cabdi Barre ayaa Danjiraha cusub la wadaagay guulaha ay dowladda Federaalka ka gaartay la dagaallanka Khawaarijta, isagoo xusay in dadaalladaasi ay horseedeen xasillooni iyo kalsooni shacabka dhexdooda ah.
Waxa uu sidoo kale carabka ku adkeeyay in dalka uu ku wajahan yahay marxalad muhiim ah oo doorashooyin dadban oo hal qof iyo hal cod ah ay ka bilowdeen deegaano dhowr ah, taas oo ah tallaabo weyn oo ku wajahan dhismaha dowladnimo ku dhisan rabitaanka shacabka.
Danjire Charles Nicholas King ayaa dhankiisa ballan qaaday in dowladda UK ay sii wadi doonto taageerada ay siiso shacabka iyo dowladda Soomaaliya, isaga oo muujiyay in uu diyaar u yahay in uu xoojiyo xiriirka taariikhiga ah ee labada dal.
RNN Somali TV ayaa si dhow ula socon doonta wada-shaqeynta UK iyo Soomaaliya, gaar ahaan dhinacyada horumarinta, amniga iyo doorashooyinka.
About The Author
