Golaha Wakiillada Dowladda Puntland ayaa maanta si rasmi ah uga xayuubiyay xubinnimada golaha iyo xilkii uu hore u hayay Cabdirashid Yuusuf Jibriil, Guddoomiyihii hore ee Baarlamaanka Puntland, kaasoo haatan qeyb ka ah shirka ka socda magaalada Laascaanood ee gobolka Sool.
Fadhigii maanta oo si gaar ah loo adkeeyay ammaankiisa, ayaa xildhibaannadu cod aqlabiyad leh ku ansixiyeen in la aqbalo lunta xubinnimada Cabdirashid Yuusuf Jibriil. Waxaa oggol ugu codeeyay 38 xildhibaan, hal xildhibaan ayaa diiday, halka 4 kalena ay ka aamuseen.
Go’aankan ayaa imaanaya xilli uu Cabdirashid Yuusuf Jibriil ka mid yahay siyaasiyiinta ku sugan magaalada Laascaanood, halkaasoo uu ka socdo shir ballaaran oo ay isugu yimaadeen siyaasiyiin kasoo horjeeda maamulka hadda jira ee Puntland, kuwaasoo taageersan gooni-u-goosadka SSC-Khaatumo.
Inkasta oo aan weli wax war ah kasoo bixin dhinaca Cabdirashid Jibriil laftiisa, haddana tallaabadan ayaa u muuqata mid siyaasad adag ku ah mas’uulkan hore, iyadoo ay sii kordhayaan khilaafaadka siyaasadeed ee hareeyay Puntland bilihii lasoo dhaafay.
Wararka qaar ayaa tilmaamaya in go’aankan uu qeyb ka yahay dadaallada ay madaxda Puntland ku doonayaan inay ku xoojiyaan gacan ku haynta baarlamaanka, isla markaana meesha looga saaro xubnaha loo arko inay taageero u yihiin fikradaha ka dhanka ah midnimada Puntland.
RNN Somali TV waxay sii wadi doontaa dabagalka arrintan, iyadoo idiin soo gudbin doonta warbixinno rasmi ah iyo falanqeyn dheeraad ah oo la xiriirta go’aanka maanta la gaaray.
About The Author
