Midowga Afrika ayaa si rasmi ah u magacaabay Ra’iisul Wasaarihii hore ee Soomaaliya iyo Madaxweynihii hore ee Puntland, Dr. Cabdiweli Maxamed Cali (Gaas), inuu noqdo Ergeyga Gaarka ah ee Guddoomiyaha Midowga Afrika u qaabilsan dalka Suudaanta Koonfureed.
Magacaabistan ayaa lagu shaaciyay warsaxaafadeed kasoo baxay xafiiska Guddoomiyaha Guddiga Midowga Afrika, Moussa Faki Mahamat, iyadoo lagu sheegay in Dr. Gaas uu leeyahay khibrad sare oo dhanka siyaasadda, diblomaasiyadda iyo xalinta khilaafaadka, taasoo ka dhigeysa shaqsi ku habboon doorkan muhiimka ah.
Guddoomiyaha Midowga Afrika ayaa sheegay:
“Dr. Cabdiweli Gaas waa hoggaan khibrad sare leh, waxaana hubnaa inuu gacan ka geysan doono dadaallada lagu doonayo in lagu xasiliyo Suudaanta Koonfureed.”
Doorka cusub ee uu qabtay Dr. Gaas ayaa ah mid mas’uuliyaddiisu ay tahay in uu fududeeyo wada-hadallada siyaasadeed, la socdo xaaladda nabadgelyo, iyo in uu kor joogteeyo geeddi-socodka nabadeed ee waddanka Suudaanta Koonfureed — dalka muddada dheer dagaalladu halakeeyeen.
Dr. Cabdiweli Gaas ayaa horey ugu soo shaqeeyay hay’ado caalami ah iyo jaamacado, wuxuuna sidoo kale hoggaamin jiray dowladda Soomaaliya intii u dhaxeysay 2011–2012, kahor inta uusan noqon madaxweynaha Puntland sannadihii 2014–2019.
Magacaabistan ayaa si weyn loogu bogaadiyey gudaha Soomaaliya, iyadoo loo arko guul u soo hoyatay dalka iyo diblomaasiyaddiisa caalamiga ah.
About The Author
