Waxaa si weyn looga dareemayaa gudaha iyo dibadda dalka farxad, rajo iyo waddaniyad ka dhallanaysa dib u howlgelinta shirkaddii diyaaradaha ee qaranka Soomaaliyeed — Somali Airlines. Sanado badan kadib burbur iyo xasilooni darro, shacabka Soomaaliyeed ayaa markale yeelanaya diyaarad ay leeyihiin, lagu soo iibiyay canshuurtooda, looguna talagalay inay noqoto astaan u taagan dib u dhiska iyo isku xirka ummadda Soomaaliyeed.
Dib u howlgalinta Somali Airlines ma ahan oo kaliya arrin farsamo ama mid duulimaad; waa dib u noolaan qaranimo, waa dareen shacab oo xooggan oo sheegaya in Soomaaliya ay maanta cagta saartay waddadii horumarka, midnimada iyo isku filnaanta.
Waxaa la filayaa in maalinta 1-da Luulyo 2025, oo ku beegan 65 guurada ka soo wareegtay maalintii ay Soomaaliya xornimada qaadatay, ay magaalada Muqdisho si rasmi ah ugu soo degaan laba diyaaradood oo kala ah Airbus A310 iyo Boeing 747, iyo diyaarad kale oo ah Fokker 50, kuwaasoo dhammaantood ah diyaarado rakaab casri ah, isla markaana leh awood sare oo adeeg u fidin kara bulshada Soomaaliyeed gudaha iyo dibadda.
Munaasabaddaas ayaa noqon doonta mid taariikhi ah oo xusuus reeb u leh jiilka maanta jooga, taasoo calaamad u noqon doonta qarannimo, horumar iyo kalsooni shacabka ku qabaan dowladdooda iyo mustaqbalkooda.
Madaxweynaha oo Hormuud ka ah Dib u Dhiska Qaranka
Madaxweynaha Jamhuuriyadda Federaalka Soomaaliya, Mudane Dr. Xasan Sheekh Maxamuud, ayaa door muuqda ka ciyaaray hirgelinta mashruucan muhiimka ah. Waxaa hoggaankiisa laga dareemayaa himilo qaranimo iyo halgan ku saleysan in dalka dib loogu soo celiyo hay’adihii daciifay, lagana dhigo kuwo u adeega shacabka.
Madaxweyne Xasan Sheekh wuxuu marar badan ku celceliyay in Soomaaliya aan la gaari karin haddii aysan Soomaali isku tashan, waxaana hirgelinta Somali Airlines ay qeyb ka tahay aragtidiisa ku aaddan “Soomaali ha is-wada taagto, ha is-wada taageerto.”
Ma ahan wax sahlan in dalkii burburay uu maanta hawada dib ugu laabto isagoo wata astaan qaran, laakiin waxay suurtagal noqotay markii uu shacabka Soomaaliyeed garab istaageen dowladdooda, iyadoo ay dhinacyada farsamada iyo maalgelinta ka taageereen dalalka saaxiibka la ah sida Turkiga iyo Qatar.
About The Author
