Boqortooyada Sacuudi Carabiya ayaa maanta ku rakibtay madaafiicda difaaca cirka duleedka magaalada barakeysan ee Makka, xilli ay malaayiin xujey ah ku sii jeedaan Banka Carafa, si ay u gutaan mid ka mid ah rukunnada waaweyn ee Xajka.
Tallaabadan ayaa timid iyadoo ay jiraan walaacyo amni oo mararka qaar la xiriira kooxaha hubeysan ee gobolka ka hawlgala, inkasta oo aysan jirin hanjabaad rasmi ah oo si toos ah loola xiriiriyay Xajka sanadkan.
Dadka qaar oo arrintan ka falceliyay baraha bulshada ayaa sheegay in badbaadada Martida Ilaahay (Xujeyda) ay tahay mid uu Alle damaanad qaaday, halka kuwo kalena ay ku nuuxnuuxsadeen in aysan jirin cid awood u leh inay dhibaato u geysato dadka xajineysa iyadoo ay jiraan awooda iyo ilaalinta Eebbe.
Hadalkaasi waxaa si gaar ah loogu tilmaamay in uu muujinayo kalsoonida ruuxiga ah ee Muslimiinta u qabaan ammaanka Xajka iyo sida Sacuudigu si aad ah u diyaariyo sugidda badqabka Xujeyda sanad walba.
Waxaa la filayaa in maalmaha soo socda ay si weyn u socdaan dhaq-dhaqaaqyada xujeyda, iyadoo la galayo waqtiyada ugu muhiimsan Xajka, sida Taagga Carafa, Muna, iyo Rami-jamarat-ka. Sacuudiga ayaa dhankiisa kor u qaaday heerka feejignaanta si uu u xaqiijiyo xaj nabad ah.
About The Author
