Maxamed Jibriil, Agaasimaha Isgaarsiinta iyo Warbaahinta ee Wasaaradda Qurbajoogta iyo Maalgashiga Soomaaliya, ayaa si rasmi ah ugu furay Muqdisho, tababarka xirfadaha saxaafadda ee loogu talagalay xirfadlayaasha warbaahinta gudaha iyo qurbaha. Tababarkani ayaa noqonaya fursad muhiim ah oo loogu kordhinayo aqoonta, xirfadaha, iyo fahamka warbaahinta casriga ah ee ku saabsan qaababka iyo farsamooyinka cusub ee isgaarsiinta.
Tababarka oo lagu qabtay xarunta Wasaaradda, ayaa waxaa ka soo qeybgalay wakiillo ka socday warbaahinta, saxaafiyiinta, iyo xubno ka tirsan hay’adaha dowladda iyo ururada bulshada. Ujeedada ugu weyn ee tababarkan ayaa ah in la xoojiyo tayada warbaahinta dalka, iyadoo la siinayo fursado ay ku bartaan farsamooyinka cusub iyo sida loo isticmaalo qalabka teknolojiyadda ee casriga ah.
Mudane Maxamed Jibriil, oo ka hadlay furitaanka tababarka, ayaa si cad u tilmaamay in warbaahinta ay door muhiim ah ka ciyaarayso horumarinta bulshada iyo dhiirrigelinta wada-shaqaynta bulshada iyo dowladda. Waxa uu sheegay in xirfadaha saxaafadda iyo awoodda warbaahintu ay muhiim u yihiin in la gaarsiiyo bulshada xog muhiim ah oo ku saabsan horumarka dalka iyo arrimaha muhiimka ah ee ka jira.
Maxamed Jibriil. ayaa sidoo kale ku boorriyay saxaafiyiinta inay ka qayb qaataan barnaamijyada isgaarsiinta ee casriga ah, si loo helo warar sax ah oo daahfuran, isla markaana bulshada looga wacyi geliyo fursadaha maalgashi ee dalka ka jira iyo sida ay muwaadiniinta u caawin karaan dowladda si loo gaadho horumar waara.
“Xirfadaha saxaafadda waa furaha horumarinta bulshada. Waxaan ku faraxsanahay in tababarkan uu qayb ka yahay dadaallada aan ugu jirno in aan kordhinno aqoonta iyo xirfadaha saxaafiyiinta, taasoo qeyb ka ah horumarinta guud ee dalka,” ayuu yiri Agaasime Maxamed Jibriil.
Tababarkani ayaa sidoo kale waxa uu xoogga saaray sidii loo abuuri lahaa isbeddelka warbaahinta ee la jaanqaadaya baahiyaha bulshada, iyadoo si gaar ah loo tixgelinayo kororka adeegyada dijitaalka ah iyo warbaahinta bulshada ee saameyn ku yeelanaya habka isgaarsiinta caalamiga ah.
Maxamed Jibriil, isagoo ka hadlayay muhiimadda tababarkan, waxa uu ugu baaqay dhammaan warbaahinta iyo saxaafiyiinta inay si joogto ah uga faa’iidaystaan fursadaha aqoon korodhsiga ee noocan oo kale ah, si loo gaaro horumar la taaban karo.
Ugu dambeyntii, tababarkan ayaa la rajeynayaa inuu dhiso xirfado cusub oo ay warbaahinta iyo saxaafiyiinta Soomaaliyeed ka faa’iidi doonaan, taasoo ka caawin doonta inay horumariyaan tayada wararka iyo saxaafadda guud ahaan. Horumarinta saxaafadda ayaa sidoo kale kaalin weyn ka qaadan doonta dhiirrigelinta is-dhexgalka bulshada iyo xoojinta kalsoonida dadka ee dowladda iyo hay’adaha kale ee bulshada.
About The Author
