Nairobi, Kenya – 12 Juun 2025: Madaxweynaha Kenya William Ruto ayaa ku eedeeyey bangiyo ku yaalla gudaha Soomaaliya, Kenya iyo Koonfur Afrika in ay door ku yeesheen maalgelintii weerarkii argagixiso ee lagu qaaday hotelka DusitD2 ee magaalada Nairobi sanadkii 2019, weerarkaas oo ay sheegatay kooxda Al-Shabaab.
Madaxweyne Ruto ayaa hadalkan ka jeediyey xuska sanad-guuradii 6-aad ee weerarkaasi, isaga oo tilmaamay in kooxaha argagixisadu ay si xeeladaysan u adeegsadaan nidaamka maaliyadeed ee gobolka si ay u fuliyaan falalkooda halista ah.
“Waxaa jira shabakad ballaaran oo maaliyadeed oo ka howlgasha Soomaaliya, gudaha Kenya iyo xitaa Koonfur Afrika, kuwaas oo loo adeegsaday maalgelinta weerarkii DusitD2,” ayuu yiri Madaxweyne Ruto.
Wuxuu sidoo kale xusay in dowladdiisu ay xoojineyso la-socodka dhaq-dhaqaaqyada bangiyada iyo hay’adaha kale ee maaliyadeed si looga hortago in dalka laga fuliyo weerarro kale oo la mid ah.
Hadalka Ruto ayaa imanaya xilli ay Kenya sii kordhisay feejignaanta la xiriirta weerarrada Al-Shabaab, kuwaas oo ay marar badan sheegatay mas’uuliyaddooda. Dowladda Kenya waxay sidoo kale sheegtay in ay sii xoojin doonto wadashaqeynta ay la leedahay waddamada gobolka si loo burburiyo ilaha dhaqaale ee kooxaha xagjirka ah.
Illaa hadda, ma jiraan wax jawaab rasmi ah oo ka soo baxay dowladaha Soomaaliya ama Koonfur Afrika oo ku aaddan hadalka Ruto. Si kastaba, eedeyntan ayaa laga yaabaa inay horseeddo cadaadis siyaasadeed iyo mid diblomaasiyadeed oo cusub.
Weerarkii DusitD2
Weerarka lagu qaaday xarunta DusitD2 ee Nairobi 15-kii Janaayo 2019, ayaa waxaa lagu dilay 21 qof, halka in ka badan 700 qof la badbaadiyey. Kooxda Al-Shabaab ayaa sheegtay mas’uuliyadda weerarkaasi, waxayna markaa kadib Kenya kordhisay weerarada ka dhanka ah kooxdaas gudaha Soomaaliya.
About The Author
