Haabaay, Degmada Warsheekh, Shabeellaha Dhexe — Juun 29, 2025 — Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, oo ay wehliyaan Madaxweynaha Hirshabeelle iyo Guddoomiyaha Gobolka Banaadir, ayaa maanta si rasmi ah dhagax-dhig ugu sameeyay garoonka cusub ee diyaaradaha ‘New Mogadishu International Airport’ oo laga dhisayo deegaanka Haabaay ee degmada Warsheekh.
Garoonkan cusub ayaa la sheegay inuu noqon doono garoonka ugu weyn Soomaaliya, isla markaana door muhiim ah ka ciyaari doono horumarinta kaabeyaasha dhaqaalaha, kor u qaadista isku xirka caalamiga ah iyo shaqo abuurka dalka.
Madaxweyne Xasan Sheekh ayaa xusay:
“Maanta waa maalin taariikhi ah. Garoonkani wuxuu noqon doonaa mid casri ah oo isbeddel weyn ku keeni doona xiriirka duulista hawada Soomaaliya, wuxuuna u adeegi doonaa shacabka Soomaaliyeed iyo ganacsiga gobolka.”
Mashruucan ayaa ka mid ah qorsheyaasha dowladda ee dib-u-dhiska dalka, waxaana uu yeelan doonaa:
• Terminal casri ah
• Waddooyinka diyaaraduhu ka degaan oo ballaaran
• Goobo loogu talagalay adeegyada xamuulka iyo rakaabka ee heer caalami ah
Garoonka ayaa la rajeynayaa inuu noqdo xarun istiraatiiji ah oo lagu xiro Soomaaliya dunida inteeda kale.
RNN Somali TV
📡 www.rnnsomalitv.com
📧 rnnsomalitv@gmail.com
📞 +252 611 222 246
About The Author
