Madaxweynaha Dowladda Jubaland, Mudane H.E. Axmed Maxamed Islaam (Madoobe), ayaa maanta si rasmi ah dib ugu soo laabtay magaalada Kismaayo, oo ah caasimadda ku-meel-gaarka ah ee Jubaland, kadib safar shaqo oo uu maalmahan u joogay dalka dibaddiisa.
Madaxweynaha ayaa waxaa si diirran loogu soo dhoweeyay garoonka diyaaradaha Kismaayo, halkaas oo ay ku sugnaayeen xubno ka tirsan golayaasha dowladda Jubaland, saraakiil ciidan, iyo dadweyne fara badan oo muujinayay taageeradooda.
Safarka uu Madaxweynaha ku tagay dibadda ayaa la sheegay inuu la xiriiray arrimo muhiim ah oo ku saabsan horumarinta Jubaland, xiriirka caalamiga ah, iyo iskaashi la xiriira amniga iyo adeegyada bulshada. Inkastoo faahfaahin rasmi ah laga bixin doonin kulamadii uu la yeeshay madaxda iyo daneeyayaasha uu la kulmay, haddana saraakiil ka tirsan xafiiska Madaxweynaha ayaa tilmaamay in safarku uu ahaa mid miro-dhal ah.
Dib u soo laabashada Madaxweynaha ayaa kusoo beegmaysa xilli isbeddello siyaasadeed iyo dib u heshiisiin ka dhex socoto madaxda maamul goboleedyada, waxaana la filayaa in Madaxweynaha Jubaland uu kulammo la qaato xubno ka tirsan dowladda federaalka iyo madaxda kale ee heer gobol si loo xoojiyo is-afgaradka siyaasadeed ee dalka.
About The Author
