Muqdisho, 6-da May 2025 – Madaxweynaha dowlad-goboleedka Galmudug, Ahmed Abdi Kariye (Qoorqoor), ayaa maanta magaalada Muqdisho kulan kula qaatay hoggaamiyaha maamulka SSC-Khaatumo, Cabdiqaadir Axmed Aw-Cali (Firdhiye).
Kulanka ayaa diiradda lagu saaray xoojinta wadashaqeynta labada maamul, sidii loo adkeyn lahaa midnimada ummadda Soomaaliyeed iyo in la iska kaashado arrimaha amniga iyo horumarka deegaannada ay maamulaan labada dhinac.
Sidoo kale, waxaa laga wada hadlay sidii loo dhisi lahaa isfaham siyaasadeed oo dhexmara maamulka SSC-Khaatumo iyo dowlad-goboleedyada kale ee dalka, iyadoo la eegayo xaaladda guud ee Soomaaliya iyo dadaallada socda ee dib-u-heshiisiinta.
Kulankan ayaa imaanaya xilli SSC-Khaatumo ay raadineyso xiriir rasmi ah oo ay la yeelato dowlad-goboleedyada iyo dowladda federaalka, si loo xaqiijiyo matalaad buuxda iyo taageero siyaasadeed.
Dhanka kale, labada mas’uul ayaa isku raacay muhiimadda ay leedahay wadajirka shacabka Soomaaliyeed iyo ilaalinta dastuurka dalka.
About The Author
