Warar xog ogaal ah ayaa daaha ka qaaday fadeexad siyaasadeed oo si weyn u gilgishay sumcadda Dowladda Federaalka Soomaaliya, kadib markii xubno ka tirsan wafti rasmi ah oo safar shaqo ku tagay dalka Switzerland ay iska dhiibeen dalalka Yurub.
Waftigan oo la sheegay in lagu magacaabay matalaadda dowladda, ayaa markii ay gaareen Switzerland, waxaa la xaqiijiyay in afar (4) xubnood oo kaliya ay dalka dib ugu soo laabteen. Intii kale waxay dalbadeen magangelyo siyaasadeed, iyagoo doorbiday in aysan dib ugu laaban dalkii ay ka socdeen.
Eedeymo Lala Xiriirinayo Iibinta Viisaha Dowladda
Ilo-wareedyo madax bannaan ayaa sheegaya in socdaalkani aanu si buuxda u salaysneyn mas’uuliyad rasmi ah, balse uu xiriir la lahaa iibinta viisooyin dowladeed, taasoo ay dad gaar ah uga faa’iideysteen sidii ay ugu safri lahaayeen dalalka Yurub. Eedeymuhu waxay tilmaamayaan in fursadihii matalaadda rasmiga ah ee qaranka lagu beddelay dano shakhsi ah oo la xiriira safarro tahriib u muuqda oo magac dowladeed ku maraya waddo sharci darro ah.
Arrintani waxay dhaawac weyn gaarsiisay kalsoonida lagu qabi karo howlaha safarrada rasmiga ah ee Dowladda Federaalka, waxayna su’aal gelisay nidaamka ay dowladda u maamusho socdaallada dibadda.
Tahriib Dowladeed iyo Dhallinyaro Badda Ku Luma
Dhinaca kale, dad badan ayaa la yaaban siyaasadda socdaalka ee dowladda Soomaaliya, iyadoo warar hore u baxay ay muujinayaan in boqolaal dhallinyaro Soomaaliyeed loo diray doonyo tahriib ah oo ka baxa xeebaha dalka, iyada oo si dadban ama toos ah dowladda ay ugu lug leedahay. Dhammaan ficilladan waxay sababeen in la waayo nolosha kumannaan dhallinyaro ah, kuwaas oo ku dhintay ama la la’yahay meelaha u dhexeeya Libya, Algeria, iyo Spain.
Dhacdooyinkan waxay muujinayaan xaalad murugo leh oo ay ku sugan tahay hay’adnimada dowladda iyo sida magac dowladeed loogu adeegsanayo ujeeddooyin aan sharci ahayn. Dhibbanaha ugu weyn ee nidaamkan waa muwaadinka Soomaaliyeed ee mustaqbalkiisa la iibsado, karaamadiisana lagu beddelo lacag iyo dano gaar ah.
About The Author
