Wararka ka imaanaya gobolka Shabeellaha Hoose ayaa sheegaya in duqeymo diyaaradeed iyo howlgallo dhanka dhulka ah ay ka dhaceen deegaanno ay ka mid yihiin Tooratoorow, Dugule, Fay Yusuf, Farsooley, Boojalow, iyo Doon Buraale. Howlgalladan ayaa waxaa fuliyay ciidamada xoogga dalka ee Danab, kuwaas oo beegsaday saldhigyo ay Al-Shabaab ku lahaayeen deegaannadaas.
Sida laga soo xigtay ilo-wareedyo lagu kalsoon yahay, duqeymaha ayaa lagu bartilmaameedsaday xarumo muhiim ah oo ay ku sugnaayeen dagaalyahanno iyo taliyeyaal sare oo ka tirsan Al-Shabaab. Wararka qaar ayaa sheegaya in ugu yaraan 12 xubnood oo ay ku jiraan hoggaamiyeyaal sare lagu dilay howlgalladan qorsheysan.
Dadka deegaanka ayaa sheegay in duqeymaha iyo dagaallada dhulka ah ay sababeen cabsi iyo walaac soo wajahday shacabka ku nool deegaannadaas. Ciidamada Danab ayaa la sheegay inay ku guuleysteen inay burburiyaan saldhigyo muhiim ah oo ay Al-Shabaab ku lahaayeen goobaha la beegsaday.
Maamulka gobolka Shabeellaha Hoose iyo saraakiisha ciidamada ayaa sheegay in howlgalladan ay qeyb ka yihiin dadaallada lagu wiiqayo awoodda Al-Shabaab ee gobolka, iyagoo xusay in ay sii wadi doonaan weerarada ka dhanka ah kooxdaas ilaa laga ciribtirayo.
Xaaladda deegaannada la duqeeyay ayaa weli kacsan, waxaana jira dhaq-dhaqaaqyo ciidan oo ay wadaan ciidamada dowladda, iyagoo kaashanaya saaxiibada caalamiga ah, si loo xaqiijiyo nabadgelyada iyo xasilloonida gobolka Shabeellaha Hoose.
About The Author
