Gaalkacyo – Wararka naga soo gaaraya magaalada Gaalkacyo ee gobolka Mudug ayaa sheegaya in koox maleeshiyaad hubeysan ay caawa fiidkii dileen nin iyo xaaskiisa, kadib markii lagu weeraray gaari ay saarnaayeen, xilli ay kasoo hoyanayeen Beerta Bilan.
Goobjoogayaal ayaa sheegay in weerarku ka dhacay bartamaha magaalada Gaalkacyo, gaar ahaan agagaarka xaafadda ay ku laheyd qoyska la beegsaday. Labada marxuum ayaa la sheegay in si toos ah loogu rasaaseeyay gaarigooda, iyadoo ay si lama filaan ah ugu dhaceen maleeshiyaadku.
Kooxdii Weerarka Fulisay oo Baxsatay
Wararka hordhaca ah waxay tilmaamayaan in dableyda weerarka fulisay ay si degdeg ah uga carareen goobta, iyaga oo la sheegay in ay ku baxsadeen dhanka kaamka Tawakal oo ku dhow Beerta Bilan. Lama oga ilaa iyo hadda cidda ay yihiin iyo sababta ay falkan u geysteen.
Ciidamada Ammaanka oo Aan Wali Ka Hadlin
Ilaa iyo xilligan, ma jirto wax war ah oo kasoo baxay laamaha ammaanka ee Gaalkacyo, inkastoo ciidamada ammaanku ay tageen goobta uu falka ka dhacay. Maydadka labada qof ee la dilay ayaa la geeyay isbitaalka guud ee magaalada.
Sababta Dilka oo Aan La Ogeyn
Ilaa hadda lama oga sababta rasmiga ah ee ka dambeysa dilkan foosha xun ee loo geystay lamaanahaas oo sida la sheegay ciidda ka yimid xilli habeenimo ah oo ay kasoo laabteen dalxiis gaaban oo ay ku tageen Beerta Bilan. Dadka deegaanka ayaa muujiyay walaac ku saabsan amniga magaalada iyo kordhinta falalka amni darrada ah.
About The Author
