Ciidamada milatariga dalka Eritrea ayaa habeenimadii lasoo dhaafay duqeymo culus ku qaaday deegaanka Bure, oo ku yaalla xadka u dhexeeya Eritrea iyo gobolka Canfarta ee waqooyiga Itoobiya, islamarkaana qiyaastii 80 KM u jira dekedda muhiimka ah ee Casab ee Badda Cas.
Saraakiisha Eritrea ayaa ku andacoonaya in deegaanka Bure uu noqday xarun tababar oo lagu diyaariyo kooxo kasoo horjeeda dawladda Asmara, kuwaasoo la sheegay in laga taageero gudaha Itoobiya. Weerarkan ayaa billow u noqon kara iska hor imaad ballaaran oo militari oo dhexmara labada dal, kuwaasoo horey u lahaa taariikh dagaal oo dheer.
Saan-saan dagaal iyo is-xulufeysi cusub
Warar hoose oo laga helayo waqooyiga Itoobiya ayaa muujinaya in saacad kasta uu bilaaban karo dagaal weyn, iyadoo ciidamo kala duwan ay isugu tagayaan xadka labada dal.
Waxaa jirta cabsi xoogan oo laga qabo in dagaalka uu isu beddelo mid qaran-ballaadhan, iyadoo xulafeysi milatari la ogaanayo. Wararka ayaa tilmaamaya in dalalka:
• Eritrea
• Jabhadda Tigray
• Sudan
• iyo Masar
ay si hoose uga wadahadleen iskaashi milatari oo ka dhan ah Itoobiya, taasoo keeni karta isbeddel weyn oo ku yimaada juqraafiyadda amniga Bariga Afrika.
Saamaynta Geeska Afrika
Haddii dagaalkani qarxo, waxaa la filan karaa saameyn toos ah oo ku timaadda:
• Ganacsiga dekadaha (gaar ahaan Casab)
• Qaxootinimo baahsan oo ku wajahan dalalka dariska ah
• Iyo xiisad diblomaasiyadeed oo saameysa xiriirka Itoobiya iyo Masar, oo horeyba ugu muransanaa webiga Nile.
Weli lama hayo wax jawaab rasmi ah oo kasoo baxay dowladda Itoobiya ee ku saabsan duqeyntii Bure. Sidoo kale, beesha caalamka kama aysan hadlin weerarkan.
About The Author
