Ciidamada gaarka ah ee la dagaallanka argagixisada ee SOG (Special Operations Group) ayaa howlgal qorsheysan oo ay ka fuliyeen waaberigii hore deegaanka u dhexeeya Dhadhaab iyo Xagardheere ee gobolka Garissa, waxay ku dileen dagaalyahan ka tirsan kooxda Al-Shabaab.
Howlgalka ayaa yimid kaddib markii la helay xog muhiim ah oo laga helay shacabka deegaanka, taas oo sheegaysay in maleeshiyaad Al-Shabaab ah ay doonayeen in ay miinooyin ku xiraan waddada istiraatiijiga ah ee u dhaxeysa Dhadhaab iyo Xagardheere. Ciidamada SOG oo si degdeg ah uga falceliyay xogtaas, ayaa si qorsheysan ugu weeraray kooxdii hubeysneyd, halkaasna uu ka dhacay iska horimaad culus.
Wararka rasmiga ah ee laga helay hay’adaha ammaanka ayaa sheegaya in hal dagaalyahan lagu dilay goobta, halka saddex kale ay dhaawacyo kala duwan soo gaareen. Intaa waxaa dheer, ciidamada ammaanka ayaa gacanta ku dhigay hub fara badan oo ay ka mid yihiin:
• Hal qori PKM ah oo ah qori culus
• Qalab lagu farsameeyo miinooyinka (IEDs)
• Rasaas iyo agab kale oo ciidan
Sida uu sheegay sarkaal sare oo ka tirsan ciidamada SOG, howlgalka waxa uu qeyb ka yahay olole ballaaran oo lagu bartilmaameedsanayo kooxaha argagixisada ee ku dhuumaaleysanaya xuduudda u dhexeysa Kenya iyo Soomaaliya. Sarkaalkaasi wuxuu sidoo kale bogaadiyay kaalinta shacabka deegaanka oo si dhow ula shaqeeyay ciidamada, taasoo sahashay in laga hortago khatar weyn oo miinooyin ah oo la doonayay in lagu waxyeelleeyo dad rayid ah iyo ciidamo.
Hay’adaha ammaanka ayaa sheegay in howlgalladu ay sii socon doonaan, iyadoo la sii wadayo raadinta xubnaha kale ee kooxdaas ku lugta leh, si loo sugo amniga shacabka Soomaaliyeed iyo kuwa Kenyan ah ee ku nool xuduudaha labada dal.
RNN Somali TV
La soco wararka amniga ee gobolka si joogto ah.
About The Author
