Inta la xaqiijiyay 2 ruux oo shacab ah ayaa geeriyootay mid kaana wuu ku dhaawacmay kaddib markii askari katirsan ciidanka dowladda uu rasaas ku furay dad shacab ah oo ku sugan xaafada Soona-key ee degmada Hodan ee gobolka Banaadir.
Dhacdadaan ayaa timid kaddib markii dadka ka careysan in la burburiyo guryo ay ka dagan yihiin xaafada Soona-key ka hor tageen askar si qasab ah ku burburineysay guryahooda.
Goob joogayaal kamid ah dadka deegaanka ayaa warbaahinta u sheegay in askariga uu si bareer ah u toogtay gabadh 14 jir ah, halka labada ruux ee dhaawacantay midka kamid ah uu markii dambe isbitaalka ku geeriyooday.
Waxa ay shegeen dadka deegaanka, haddii ay wax ka qaban weyso dowladda federaalka dadka doonaya in ay dhulkooda ka boobaan ay ku Jihaadi doonan iskana dhicin doonaan.
“Xaafadda Soona-key ma ahan dhul dowladeed waxaa la rabaa in dhulkeena la dhaco, hal gabar oo hadli karto ma jirto xabad ayaa nagula jawaabaya waxaana noogu jawaabeysa degmada Hodan, waxaana nahay dhibanayaal wixii halkan ka dhaca hal ogaado, madaxdana ha ogaato” ayey tiri haween kamid ah dadka deegaanka.
Ma jirto ilaa iyo hadda mas’uul katirsan maamulka degmada Hodan oo ka hadlay dilka labada ruux ee shacabka ee askariga katirsan ciidanka dowladda ugu geystay xaafadda Soona-key ee degmada Hodan ee Gobolka Banaadir.
