Madaxweynaha Dowladda Federaalka Soomaaliya, Mudane Xasan Sheekh Maxamuud, iyo wafdi uu hoggaaminayo ayaa maanta gaaray magaalada Qaahira ee caasimadda dalka Masar, halkaas oo uu uga bilowday safar shaqo rasmi ah.
Madaxweynaha ayaa si diirran loogu soo dhaweeyay garoonka caalamiga ah ee Qaahira, waxaana halkaasi ku qaabilay mas’uuliyiin sare oo ka tirsan dowladda Masar iyo diblomaasiyiin Soomaaliyeed.
Inta uu joogo Masar, Madaxweyne Xasan Sheekh ayaa la filayaa inuu kulan muhiim ah la yeesho dhiggiisa dalkaasi, Madaxweyne Cabdulfataax Al-Sisi. Labada hoggaamiye ayaa si qoto dheer uga wada hadli doona xoojinta xiriirka laba geesoodka ah ee u dhexeeya Soomaaliya iyo Masar, iyagoo xoogga saaraya iskaashiga dhinacyada amniga, dhaqaalaha, waxbarashada, caafimaadka iyo arrimaha gobolka.
Kulanka labada Madaxweyne ayaa sidoo kale la filayaa in lagu gorfeyn doono xaaladda siyaasadeed iyo amni ee ka taagan Geeska Afrika, gaar ahaan xiisadaha u dhexeeya dalalka gobolka, iyo doorka labada dal ee ku aaddan xasilinta iyo horumarinta guud ahaan gobolka.
Safarka Madaxweyne Xasan Sheekh ee Masar ayaa imaanaya xilli ay sare u kacday xiisadda gobolka, gaar ahaan kadib markii Itoobiya ay dhammeysatay mashruuca biyo-xireenka Webiga Nile, taasoo dhalisay walaac ka yimid dalalka Masar iyo Suudaan.
RNN Somali TV waxay si dhow ula socon doontaa kulanka labada Madaxweyne iyo natiijooyinka kasoo baxa, iyadoo shacabka Soomaaliyeed la wadaagi doonta warbixinno rasmi ah iyo falanqeyn buuxda.
About The Author
