Siyaasiga caanka ah ee Soomaaliyeed, Cabdiraxmaan Cabdishakuur Warsame, ayaa si adag u dhaliilay hoggaanka Madaxweyne Xasan Sheekh Maxamuud, isagoo hadal culus oo miisaan leh ka jeediyay baraha bulshada. Cabdiraxmaan ayaa si gaar ah uga hadlay ballanqaadyadii iyo rajadii laga qabay Madaxweyne Xasan xilligii uu mucaaradka ahaa, iyo sida ay wax u socdaan maanta.
Isagoo xasuusinaya hadal uu horey u oran jiray Madaxweyne Xasan Sheekh, ayuu yiri: “Xasan Sheekh markuu Farmaajo la hadlayo wuxuu dhihi jiray inaan joogo jecliyaa. Hadda waxaan leenahay: Villa Somalia nolol ayaa ka dambeysa.” Hadalkan ayaa si toos ah u muujinaya isbeddelka weyn ee ku yimid dareenka shacabka Soomaaliyeed ee ku aaddan xukuumadda hadda jirta.
Cabdiraxmaan ayaa tilmaamay in xilligii mucaaradka uu Xasan Sheekh ahaa, shacabka ay rajo ka qabeen hoggaankiisa, balse maanta ay la kulmayaan cadaadis, niyad-jab, iyo xaalad amni iyo nololeed oo liidata. Wuxuu hadalkiisa u muuqday mid dhaleeceyn u ah hoggaanka Villa Somalia oo uu ku eedeeyay in aysan la jaanqaadi karin ballanqaadyadii ay hore u bixin jireen.
Hadalka Cabdiraxmaan ayaa kusoo beegmaya xilli dalka uu wajahayo dhibaatooyin siyaasadeed, amni iyo dhaqaale. Waxaa jira dagaallo ka socda gobollo dhowr ah, xiisado siyaasadeed oo ka dhex aloosan madaxda federaalka iyo kuwa dowlad-goboleedyada, iyo cadaadis kaga imaanaya bulshada rayidka ah oo ku saabsan daahfurnaanta iyo waxqabadka dowladda.
Siyaasigan oo horey xilal kala duwan uga soo qabtay dowladihii dalka soo maray, ayaa hadaladiisa loo arkaa kuwo si toos ah u beegsanaya Madaxtooyada Soomaaliya. Wuxuu marar badan caan ku noqday dhaliilo uu si furan ugu jeediyo madaxda talada haysa, isaga oo muujinaya doorkiisa mucaaradnimo.
RNN Somali TV waxay si dhow ula socotaa xaaladaha siyaasadeed ee dalka, iyadoo markasta wararka, falanqaynta iyo dhageysiga dareenka shacabka ahmiyad gaar ah siinaysa.
About The Author
