Xaaladda Bariga Dhexe ayaa gaartay meel aad u xasaasi ah kadib duqeyn culus oo lala beegsaday magaalada dekedda ah ee Bandar Abbas ee dalka Iran. Magaaladaas oo ku taalla koonfurta Iran ayaa leh muhiimad weyn oo ganacsi iyo ciidanba, waxaana weerarkaasi sababay khasaare weyn oo naf iyo maalba leh.
Wararka hordhaca ah waxay muujinayaan in duqeyntu ay bartilmaameedsatay xarumo ciidan iyo keydyo muhiim ah oo ay lahaayeen ciidamada Iran. Ilaa iyo hadda ma jiro war rasmi ah oo faahfaahin buuxda bixiyay, balse muuqaallada laga helayo baraha bulshada ayaa muujinaya guryo burburay, dab ka kacay meelo dhowr ah, iyo dad shacab ah oo ku dhaawacmay.
Warbixin rasmi ah oo ay soo saareen saraakiil sirdoon oo u dhaw dowladda Iran ayaa xaqiijiyay in Cali Shamkhani, oo ahaa la-taliyihii sare ee hoggaamiyaha ruuxiga ah Ayatullah Khamenei, uu geeriyooday kadib dhaawac culus oo ka soo gaaray weerarkii Jimcihii hore. Shamkhani wuxuu ahaa shaqsi si weyn ugu lug lahaa siyaasadda difaaca iyo istaraatijiyadda gobolka, geeridiisuna waxay noqon kartaa mid saameyn siyaasadeed oo baaxad leh ku reebta gudaha Iran iyo meelo kale oo ka mid ah Bariga Dhexe.
Dhinaca kale, caasimadda Israel ee Tel Aviv ayaa caawa lagu soo waramayaa in ay ku jirto xaalad feejignaan sare ah, iyadoo laga cabsi qabo weerar rogaal celin ah oo dhanka Iran laga soo tuuro. Ilo wareedyo gudaha Israel ah ayaa sheegay in ciidamada difaaca dalkaasi lagu amray heegan buuxa, iyadoo la filayo in ay dhacaan weerarro istiraatiji ah oo dhinacyo badan leh.
Dareenka guud ee shacabka labada dal iyo beesha caalamka ayaa ah mid buuxa oo ka cabsanaya inuu qarxo dagaal buuxa oo toos ah, midkaas oo saameyn ballaaran ku yeelan kara gobolka oo dhan. Dad badan oo ku nool dalalka jaarka la ah Iran iyo Israel ayaa hadda wajahaya cabsi laga qabo in xaaladdu ay faraha ka baxdo.
About The Author
