Galmudug – Qaylo-dhaan xoog leh ayaa kasoo yeereysa bulshada ku dhaqan deegaanada maamulka Galmudug, iyadoo lagu cabirayo dareen murugo leh oo ka dhashay colaad sokeeye oo sanado badan soo jiitameysay, kana dhigtay in qaybo badan oo bulshada ah ay ku noolaadaan xaalad cabsi iyo kala dambeyn la’aan ah.
Waxaa la sheegaya in hooyooyin badan oo reer Galmudug ah ay habeenkii seexdaan iyaga oo aan garaneyn halka ay wiilashoodu ku sugan yihiin, qaarna ayba waayeen gabdhahoodii ama carruurtoodii oo lagu dilay dagaalada. Aabbayaal murugo iyo gablan la seexda ayaa noqday xaalad caadi ah oo hareysay noloshii shacabka.
Colaado Qabiil Oo Xooggan
Warbixino laga helayo gudaha Galmudug ayaa muujinaya in aysan jirin labo beelood oo deggan Galmudug oo nabad buuxda ku wada nool. Taa beddelkeeda, waxay bulshada u kala qaybsan yihiin beelo ku dagaallamaya dhul, siyaasad, iyo aargoosi soo jireen ah oo mar kasta sababa dhiig cusub oo daata.
Xaaladda ayaa keentay in shacabka reer Galmudug ay noqdaan dad nafahooda waardiye u ah, ayaga oo mar kasta u diyaarsan in ay ka barakacaan guryahooda ama ay la kulmaan weerarro kadis ah.
Su’aalaha Muuqda: Ma Jirtaa Galmudug?
Dad badan oo ka mid ah shacabka Galmudug ayaa si cad u su’aal gelinaya jiritaanka maamulka Galmudug. Waxaa la is weydiinayaa:
• Ma jirtaa Galmudug dhab ah oo u taagan daryeelka dadka?
• Ma jiraa madaxweyne ka war haya xaaladda dhabta ah?
• Ma jiro waxqabad la taaban karo oo ka dhashay xafiisyada dowladda deegaanka?
Waxaa xusid mudan in maamulka hadda jira ee Galmudug uu fadhiya xafiiska muddo ku dhow shan sano iyo bilo, hase yeeshee dad badan ayaa rumeysan in aanay jirin wax muuqda oo uu ku faani karo muddadaas dheer.
Dhibaatooyin Soo Jiitamayay Tobaneeyo Sano
Galmudug ayaa lagu tilmaamay inay tahay maamulka kaliya ee aan xal u helin dagaal qabiil oo si joogto ah u dhacayey muddo ku dhow 47 sano. Xitaa inta badan shacabka deegaanka ayaa dareensan in maamulka uu ka gaabiyay ilaalinta nolosha dadka—iyadoo wiilasha dhallinyarada ah ee la dilayo ay noqonayaan tiro aad u badan maalin kasta.
Intaa waxaa dheer, dadka reer Galmudug waxay rumeysan yihiin in hogaanka maamulku uu awoodiisa iyo waqtigiisa geliyo la macaamilka hay’adaha iyo ururada, halkii uu xoogga saari lahaa xalinta colaadaha, ilaalinta ammaanka, iyo u adeega shacabka uu metelo.
Gunaanad: Gargaar iyo Isbeddel Degdeg Ah ayaa Loo Baahan Yahay
Xaaladda ka taagan Galmudug waxay u baahan tahay feejignaan caalami ah, taageero bulsho, iyo isbeddel hoggaan oo dhab ah. Haddii aan xal waara laga gaarin dagaalada sokeeye ee sii xoogeysanaya, waxaa sii fogaan doona kalsoonidii shacabka iyo jiritaanka maamulka laftiisa.
About The Author
