Muqdisho – 10 May 2025 – Roobab culus oo ka da’ay magaalada Muqdisho ayaa si weyn u saameeyay shaqadii hay’adaha dowladda, gaar ahaan howlaha Guddiga Madaxa Banaan ee Doorashooyinka Qaranka (GMDQ), sida uu sheegay guddoomiyaha guddigaas, Mudane Cabdikariin Axmed Xasan.
Guddoomiye Cabdikariin ayaa sheegay in xaaladda cimilada ee caawa aysan u saamaxayn inay ku laabtaan guryahooda, isla markaana aysan la xiriiri karin mas’uuliyiinta heer degmo iyo heer gobol.
“Caawa guryaheena ma aadi karno, roob culus ayaa da’ay, Guddoomiyaha gobolka ama guddoomiye degmo lama hadli karno,” ayuu yiri, isagoo xusay in xaaladda tahay mid caqabad weyn ku noqotay howlaha doorashooyinka.
Roobabka ayaa sababay daadad ku fatahay qaar ka mid ah xaafadaha magaalada, iyadoo waddooyin badani noqdeen kuwo aan la mari karin. Arrintan ayaa sidoo kale carqalad ku noqotay gaadiidka iyo xiriirka shaqo ee u dhexeeya hay’adaha dowladda.
Guddiga Doorashooyinka ayaa bishii hore bilaabay qabanqaabada iyo qorsheynta marxaladaha doorasho ee cusub, iyadoo ay socdeen kulamo muhiim ah oo la xiriira diiwaangelinta codbixiyeyaasha iyo wacyigelinta dadweynaha.
Guddoomiyaha ayaa ugu dambeyn ugu baaqay dowladda iyo maamulka gobolka in ay si degdeg ah uga jawaabaan caqabadaha deegaanka, gaar ahaan arrimaha la xiriira kaabayaasha waddooyinka si looga fogaado hakad mustaqbalka ku yimaada howlaha doorashada.
About The Author
