Ciidamada Jabuuti ee qeybta ka ah howlgalka Midowga Afrika ee ATMIS, kana howlgala deegaanada Galmudug, gaar ahaan magaalada Cadaado, ayaa maanta si rasmi ah u xusay Maalinta Xorriyadda dalka Jabuuti oo ku beegan 27-ka Juun.
Munaasabadda xuska ayaa ka dhacday saldhigga ciidamada Jabuuti ee ku yaalla Cadaado, waxaana ka qeyb galay saraakiil ka tirsan ATMIS, mas’uuliyiin ka tirsan maamulka Galmudug, odayaal dhaqameed, iyo qeybaha bulshada rayidka.
Ciidamada Jabuuti ayaa muujiyay dareenkooda ku aaddan muhiimadda maalintaas, iyagoo xusay in xorriyadda Jabuuti ee la helay 1977 ay astaan u tahay midnimo, dadaal iyo qaranimo.
Taliyaha ciidamada Jabuuti ee Galmudug ku sugan ayaa sheegay in ciidamadaasi ay markasta garab taagan yihiin shacabka Soomaaliyeed, gaar ahaan reer Galmudug, si loo xaqiijiyo nabadda iyo xasilloonida.
Dhanka kale, mas’uuliyiin ka tirsan Galmudug ayaa uga mahadceliyay dowladda iyo shacabka Jabuuti taageerada joogtada ah ee ay siiyaan Soomaaliya, iyagoo sheegay in xiriirka labada dal uu yahay mid qoto dheer oo walaaltinimo ku dhisan.
Munaasabadda ayaa lagu soo bandhigay suugaan iyo heeso wadani ah oo ay ciidamada Jabuuti diyaariyeen, taasoo ka tarjumaysay farxadda maalinta xorriyadda.