Magaalada Wajeer ayaa maanta la geliyay xaalad kacsanaan ah, kadib markii meydka ganacsade Mahat Ali Gedi laga arkay hara-biyaha Lagta Yahuud. Marxuumka, oo la waysanaa tan iyo shalay, ayaa meydkiisa loo qaaday qeybta meydadka ee Isbitaalka Wajeer, halkaas oo baaritaanno lagu sameynayo.
Wararka hordhaca ah ayaa tilmaamaya in Mahat loo dilay si ula kac ah. Dilkan ayaa kusoo beegmaya xilli horey looga shakiyay kiis la xiriiray ganacsade kale oo isna lagu waayay magaalada, kaas oo aan wali raadkiisa la helin. Kiisaskan ayaa walaac xooggan ka abuuray shacabka ku dhaqan magaalada Wajeer.
Banaanbaxyo Gilgilay Wajeer
Galabta ayaa boqolaal qof isugu soo baxay waddooyinka magaalada Wajeer, iyagoo ku dalbanaya in la soo qabto ciddii ka dambeysay dilka Mahat Ali Gedi. Dibadbaxayaasha ayaa sidoo kale cabasho xooggan ka muujiyay xaaladda sii xumaaneysa ee amniga magaalada iyo culeyska soo kordhaya ee ka dhashay kiisaska noocan ah.
Booliska oo Balanqaaday Baaritaan
Taliska booliska Wajeer ayaa ballan qaaday inay baaritaan qoto dheer ku sameyn doonaan dhacdadan iyo kiisaska kale ee weli xalka loo la’yahay. Waxay shacabka ugu baaqeen inay deggenaadaan inta baaritaannada socdaan.
RNN Somali TV ayaa idiin soo gudbin doonta wararkii ugu dambeeyay ee ku saabsan dhacdooyinkan. La soco si aad u hesho faahfaahin dheeraad ah.
